VOTE FOR MIZORAM

..nimahsela kei zawngin Pathian tihna avangin chutiang chuan ka ti ve lo (Neh. 5:15)


Democracy ram a awm kan nih avangin mipuiin roreltu kan thlang chhuak thin a, hruaitu tha emaw tha lo emaw thlang turin mipui kan pawimawh ber tihna a ni. Sum leh pai therhlo petu che emaw chhungkhat laina, vua leh vang/hmelhriat emaw chauh i lo thlang tawh thin a ni maithei. A nih loh leh, mi tha leh tha lo pawh ngaihtuah loin i awmna party candidate chauh i lo thlang tawh thin pawh a ni maithei. Tunah chuan kan ram siamtha turin ngun taka inngaihtuah a hun ta, khua kan tlai hma ngei hian...

Kan ramin ramin harsatna chi hrang hrang a tawk mek tih hi phat rual a ni ta lo. Hetia tluchhe maithei dinhmun a a din mek lai hian nangmah kha i pawimawh tak zet asin, I THUTLUKNA khan ram siamthatna atan nasa takin kawngro a su thei tlat a ni. I thutlukna siam a zirin he ramah hian roreltu tha, rinawm leh dik an lo ding chhuak thei a, kan ram mamawh ngawih ngawih rorelna tha, mitin huapzo sorkar a lo ding thei a ni.

YMM hian 'Chumi chu vote la, chumi chu vote suh' a ti lo. Party ruihchilhna tel lo, sum leh thildang hmanga pawlh buai loh rilru fim hmanga Mizoram tana tha ber tur ni a i hriat vote pe turin a sawm mai che a ni. I vote hmangin Mizoram chhanchhuak rawh le.

I ram, Mizoram a tlukchhiat chuan tunge dingchhuak bik ang le?

I RAMIN A KO CHE..


He thuziak hi ngun takin chhiar la, rilru fim tak puin thutlukna siam rawh le..

"Political Party ruihchilhna rilru dah bovin, therhlo leh sum leh pai hmatheh a vote zawngte hnawlin, kan ram leh hnam tan chauh Pathian rawn chungin vote ka thlak dawn tih ka intiam e"